മരുഭൂമിയിലെ മാമൂലുകൾ .

ഇന്നത്തെ കാലത്ത് കൈമണിയില്ലാതെ ഒരുകാര്യം നടക്കില്ലന്നായിട്ടുണ്ട് ..നാട്ടിൽ പല സർക്കാർ ഓഫീസുകളിലും ഇത് കൂടിയേ തീരൂ എന്ന അവസ്ഥയാണ്‌ . പക്ഷെ എന്നെ അത്ഭുതപ്പെടുത്തിയത് ഗൾഫെന്ന സ്വപ്നഭൂമിയിലെ അനുഭവങ്ങളാണ് .
                  ഞാനും എൻറെ രണ്ട് സുഹൃത്തുക്കളും കൂടി ഒരു ബിസ്സ്നെസ്സ് തുടങ്ങാൻ തീരുമാനിച്ചു .ആദ്യമായി 5000 ദിർഹം കൈമടക്ക് കൊടുത്തത് ഒരു കണ്ണൂരുകാരന് .ലൈസൻസിലെ ചില കാര്യങ്ങൾ ശരിയാക്കാൻ . സാരമില്ല !പോട്ടെന്നു വെച്ചു . കാര്യങ്ങൾ നടന്നു .ബിസ്സ്നെസ്സ് തുടങ്ങി .പക്ഷെ പച്ച കണ്ടില്ല .നാട്ടിലെ പച്ചവിട്ട് മരുഭൂമിയിൽ നോക്കിയാൽ എവിടെന്ന് കാണാൻ . പ്രവാസിയായി പോയില്ലേ ..വീണ്ടും വിശപ്പടക്കാൻ ഓടി .ഒരു ഷോപ്പ് എടുത്താലെന്തന്നു ചിന്തിച്ചു .അങ്ങനെ ഒരു ഷോപ്പ് നോക്കി അലഞ്ഞു .ഒന്നും ശരിയായില്ല .ഒടുവിൽ എനിക്ക് വേണ്ടപ്പെട്ട ഒരു സുഹൃത്തിനെ വിളിച്ചു .അവൻറെ അറിവിൽ വല്ല കടയും ഉണ്ടോന്ന് അറിയാൻ .അവൻ ഒരു കട ഒപ്പിച്ചു തന്നു .നല്ല സുഹൃത്തെന്ന് തോന്നിയെങ്കിൽ തെറ്റി .ആ കട ഒന്ന് കാണിച്ച് തന്നതിന് അവന് കൊടുക്കേണ്ടി വന്നത് 1000 ദിർഹം !. തീർന്നില്ല ,റിയൽ എസ്റ്റെറ്റുമായി കടയുടെ എഗ്രിമെന്റിനു പോയപ്പോൾ വാടക അൽപം കുറച്ച് കിട്ടാൻ ഓഫീസിലെ മിസ്രിക്ക് കൊടുത്തത് വീണ്ടും 1000 ദിർഹം . അങ്ങനെ കട ശരിയായി .ഇനി കടയിലെ ഡിക്കോറും മറ്റും ചെയ്യണ്ടേ ..അതിന് അനുമതിക്കായി മുനിസിപ്പാലിറ്റി ഓഫീസർ വന്നു .അളന്ന് പിടിച്ചപ്പോൾ തുടങ്ങാൻ പോകുന്ന ബിസ്സ്നെസ്സിന് കടക്ക് വലുപ്പം പോരെന്ന് മൂപ്പരെ കണ്ടു പിടുത്തം .ആ കണ്ടു പിടുത്തം പുറം ലോകം അറിയാതിരിക്കാൻ കൊടുത്തു വീണ്ടും ഒരു 1000 ദിർഹം . കടയുടെ മുകളിലെ ഫ്ലാറ്റിൽ തന്നെ ഒരു
താമസസൗകര്യം ഒപ്പിച്ചെടുത്തു .വെറുതയല്ല .അതിനും കൊടുത്തു 200 ദിർഹം . എല്ലാവിധ മാമൂലുകളും കൊടുത്ത് കഴിഞ്ഞപ്പോൾ കട തുടങ്ങാൻ മിച്ചം ഒന്നും ഇല്ലാതായി . ഇതാണ് ഗൾഫിന്റെ അവസ്ഥ .പണമുണ്ടാക്കാനാണ് എല്ലാവരും ഈ മരുഭൂമിയിൽ ജീവിതം ഹോമിക്കുന്നത് . പക്ഷെ ഇങ്ങനെ പിടിച്ച് പറിക്കുന്ന രീതിയിൽ പണമുണ്ടാക്കണോ ....?

                              -=========================================

                                                                                                               റൗഫ് റഹ്മത്തുള്ള ,