കുളികഴിഞ്ഞ് വസ്ത്രം മാറി തന്റെ ബാഗെടുത്ത് വീട്ടിൽ നിന്ന് പുറത്തിറങ്ങുന്നത് വരെയുള്ള സമയം ബാസിമ ഒരു കാര്യത്തിനും ഉമ്മയെ വിളിച്ച് ബുദ്ധിമുട്ടിക്കില്ല ...എട്ട് മണി എന്നൊരു സമയമുണ്ടെങ്കിൽ ബാസിമ വീട്ടിൽ നിന്ന് ഇറങ്ങിയിരിക്കും ....
വീട്ടിൽ നിന്ന് ബസ്റ്റോപ്പിലേക്ക് പതിനഞ്ച് മിനിറ്റ് നടക്കാനുണ്ട് .. അവിടന്ന് പത്തോ പതിനഞ്ചോ മിനിട്ട് ബസ്സ് കാത്ത് നിൽക്കണം .. ഇതിനിടയിൽ തന്നെ ബസിമാക്ക് രണ്ട് പൂവാലന്മാർക്ക് മുഖം കൊടുക്കേണ്ടി വരാറുണ്ട് ...
ഒന്ന് വീടിനടുത്തുള്ളവനാണെങ്കിൽ മറ്റവൻ ബസ്സ് കാത്ത് നിൽക്കുന്ന ബസ്റ്റോപ്പിന്റെ മുന്നിൽ ഒരു മൊബൈൽഷോപ്പുള്ള ഫ്രീക്കൻ ...
പക്ഷെ ഇവർക്ക് നോക്കി നിർവൃതിയടയാമെന്നല്ലാതെ ബാസിമയുടെ ഒരു നോട്ടം പോലും തിരിച്ച് കിട്ടില്ല ... അതാണ് ബാസിമ ... തേനൊലിപ്പിച്ച് നിൽക്കുന്നവർക്ക് പാത്രം വെച്ച് കൊടുക്കുന്ന ചീത്ത പെൺകുട്ടികളിൽ പെട്ടവളല്ല ബാസിമ ...!!
ബാസിമയുടെ സമയം കൃത്യമാണെങ്കിലും ബാസിമാക്ക് പോകാനുള്ള ബസ്സ് പലപ്പോഴും സമയം പാലിക്കാറില്ല ...
ബസ്സിൽ കയറുമ്പോൾ സീറ്റ് കിട്ടണേ എന്ന പ്രാർത്ഥനെ ബാസിമാക്ക് ഉണ്ടാകാറുള്ളൂ ...!!
പക്ഷെ ആ പ്രാർത്ഥന പലപ്പോഴും ഫലം ചെയ്യാറില്ല ..
ബസ്സിൽ അവൾ കയറിപ്പറ്റുമ്പോഴേക്കും കിളി ചാടിക്കയറി വിസിലടിച്ച് ഡോറടക്കുന്നത് ബാസിമയുടെ ശരീരത്തിൽ ഒരു സ്പർശനം എന്ന ലക്ഷ്യത്തോടെ തന്നെയായിരുന്നു ...
അത് അവൾക്കറിയാം .. പക്ഷെ ബസ്സിൽ എങ്ങനെയെങ്കിലും നിൽപ്പുറപ്പിക്കാൻ ശ്രമിക്കുന്നതിനിടെ അവൾക്ക് അതിൽ നിന്ന് രക്ഷപ്പെടാൻ കഴിഞ്ഞിരുന്നില്ല ....
ബസ്സിൽ സീറ്റ് കിട്ടിയില്ലെങ്കിൽ പിന്നെ അവൾക്കറിയാം തന്റെ പുറകിൽ ഏതെങ്കിലും ഒരു ഞരമ്പ് രോഗി തൂങ്ങിനിൽപ്പുണ്ടാകും എന്ന് ...
അതിൽ തന്നെക്കാൾ പ്രായം കുറഞ്ഞ കൊച്ചനുജന്മാർ മുതൽ വല്ലുപ്പയുടെ പ്രായക്കാർ വരെ ഉണ്ടാകും .....
നിസ്സഹയായ വെറുമൊരു പെൺജന്മമായി മാറുന്ന നിമിഷങ്ങൾ ......
തിക്കിനും തിരക്കിനുമിടയിലൂടെ 'ടിക്കറ്റ് ടിക്കറ്റ് ' എന്ന് വിളിച്ച് പറഞ്ഞ് കണ്ടക്ടറുടെ അങ്ങോട്ടുമിങ്ങോട്ടുമുള്ള തിക്കി ഞരുങ്ങിയുള്ള പോക്കും രക്ഷപ്പെടാൻ കഴിയാത്ത കുരുക്ക് തന്നെ ...!!
വല്ലാതെ തിരക്കുള്ളപ്പോൾ ബാസിമ മുന്നിലേക്ക് കയറിനിൽക്കും ...
അവിടെ ഡ്രൈവറുടെ വക ചില കോപ്രായങ്ങൾ കാണണം ...എന്നാലും ശരീരം സുരക്ഷിതമാണ് ..
ബസ്സിൽ നിന്നിറങ്ങുമ്പോഴും ഇതൊക്കെ തന്നെ അവസ്ഥ ....!!
ഇതെല്ലാം ആഗ്രഹിക്കുന്നവരും ആസ്വദിക്കുന്നവരും ഉണ്ടെന്ന് ബാസിമാക്ക് അറിയാം ... തന്റെ കൂട്ടുകാരികളിൽ പലരും ഇതൊക്കെ വലിയ ആവേശത്തോടെ പറയുന്നത് അവൾ എത്രയോ കേട്ടിരിക്കുന്നു ..
അവരെ പോലുള്ളവർ ഉള്ളത് കൊണ്ടാണ് തന്നെ പോലുള്ളവർക്ക് ഇങ്ങനെയൊക്കെ നേരിടേണ്ടി വരുന്നത് എന്ന് ബാസിമാക്ക് തോന്നിയിട്ടുണ്ട് ...എല്ലാവരും തന്നെപോലെയാണെങ്കിൽ ഒരു പക്ഷെ ഇങ്ങനെയൊന്നും സംഭവിക്കില്ലായിരിക്കും എന്നാണ് ബാസിമയുടെ പക്ഷം ...!!!
ബസ്സ് ഭാഗ്യത്തിന് കോളേജിന്റെ മുന്നിൽ തന്നെ ചെല്ലുന്നത് കൊണ്ട് അത്രയും രക്ഷപ്പെട്ടെന്ന് അവൾ അവളുടെ മനസ്സിനോട് തന്നെ പറയും ....
കോളേജിന്റെ പടികയറുന്നത് മുതൽ പിന്നെ അവൾ കാണേണ്ട മുഖങ്ങൾ പലതാണ് ...
പ്രണയമാണെന്ന് പറഞ്ഞ് വരുന്നവർ ... പ്രണയിച്ച് പോയി എന്ന് പറഞ്ഞ് ശല്യം ചെയ്യുന്നവർ ... സുഹൃത്താണെന്ന് പറഞ്ഞ് വരുന്നവർ ... ചുമ്മാ സംസാരിക്കാൻ വരുന്നവർ .... പഠിപ്പിക്കുന്ന അദ്ധ്യാപകൻ പോലും ശെരിയല്ലാത്ത രീതിയിൽ സംസാരിക്കൽ ......അങ്ങനെ പോകുന്നു ....
പക്ഷെ എല്ലാവർക്കും ബാസിമ വാക്കുകൊണ്ടല്ല , തൻറെ നിലപാടുകൊണ്ട് മറുപടി കൊടുക്കും ...
'ഏതൊരു വിശ്വാസത്തോടെ തന്റെ മാതാപിതാക്കൾ തന്നെ വീട്ടിൽ നിന്ന് പുറത്ത് വിടുന്നുവോ ആ വിശ്വാസം വിജയിപ്പിച്ച് കൊണ്ടല്ലാതെ താൻ തിരിച്ച് വീട്ടിൽ കയറാറില്ല എന്ന'ബാസിമയുടെ ഉറച്ചനിലപാട് ...
കടന്നുപോയ കടമ്പകളെല്ലാം തിരിച്ച് കയറി അവൾ വീട്ടിലെത്തിയാൽ ഒരു ആശ്വാസത്തിന്റെ നെടുവീർപ്പുണ്ട് ... അത് കൺകുളിർക്കെ കണ്ട് സന്തോഷിക്കുന്ന ഉമ്മയെയും ഉപ്പയെയും നോക്കി അവൾ ഒരു കണ്ണിറുക്കി ഒന്ന് പുഞ്ചിരിക്കും ...
തങ്ങളുടെ പെണ്മക്കൾ വീട്ടിൽനിന്ന് പോയി തിരിച്ച് വരുന്നത് വരെ നെഞ്ചിൽ തീയുമായി കഴിയുന്ന പാതാപിതാക്കൾ കൊതിച്ചുപോകും ബാസിമയെ പോലുള്ള ഒരു മകളെ കിട്ടാൻ .....
ബാസിമ സമൂഹത്തിന് നേർക്ക് പിടിച്ച ഒരു കണ്ണാടിയാണ് ....
അവളുടെ യാത്രയിൽ കണ്ട മുഖങ്ങൾ കാണാനുള്ള കണ്ണാടി ... ബാസിമയെ പോലുള്ള പെൺകുട്ടികൾക്ക് തങ്ങളെ കാണാനുള്ള കണ്ണാടി ......
പിച്ചിചീന്തപ്പെടാതിരിക്കട്ടെ നന്മയുടെ പെൺജന്മങ്ങളെ .....!!!!!!!
No comments:
Post a Comment
അഭിപ്രായം അറിയിക്കുക