സുമിത്ര.. (കഥ)

                 

   റോഡിലെങ്ങും തിരക്കാണ് . അടുത്തുള്ള അമ്പലത്തിലെ കുംഭഭരണി മഹോത്സവം നടക്കുകയാണ് .പൂരക്കാഴ്ച്ചകൾ ചെണ്ടമേളങ്ങളുടെ അകമ്പടിയോടെ മന്ദം മന്ദം നീങ്ങുന്നു . പൂരലഹരിയിലും മദ്യലഹരിയിലും ആളുകൾ ആർത്തുവിളിച്ച് ഉല്ലസിക്കുന്നു . റോഡരികിലെ വീടുകളിലെ ആളുകളും മറ്റുകാഴ്ചക്കാരും ഗൈറ്റിലും മതിലിനപ്പുറത്തുമായി നിന്ന് കാഴ്ചകൾ കണ്ടാസ്വതിക്കുന്നു .
പൂരക്കാഴ്ച്ചകൾ കണ്ട് നടന്നിരുന്ന അയാൾ കൂടിനിന്ന സ്ത്രീകളിൽ ഒരു പതിനാറു കാരിയെ കണ്ടപ്പോൾ ഒന്ന് തമ്പിട്ടു . അയാൾക്ക് അവളെ നല്ല പരിജയമുണ്ടായിരുന്നു . അവൾ നിൽക്കുന്നത് അവളുടെ വീടിനുമുന്നിലല്ല . അയാളുടെ ഒരു സുഹൃത്തിന്റെ വീടാണത് . നിറയെ സ്ത്രീകൾ കൂടിനിന്ന അങ്ങോട്ട്‌ എങ്ങനെ പോകുമെന്ന  ആശയകുഴപ്പത്തിലായിരുന്നു അയാൾ . തന്റെ സുഹൃത്തിനെ അവിടെ കണ്ടിരുന്നെങ്കിൽ അങ്ങോട്ട്‌ പോകാൻ അയാൾക്കൊരു ധൈര്യമുണ്ടായിരുന്നു .
കുറച്ച് മാസങ്ങൾക്ക് മുൻപാണ് അയാൾ അവളെ ആദ്യമായി കാണുന്നത് . മറ്റൊരു സുഹൃത്തിന്റെ മകളുടെ പിറന്നാളിന് . അന്ന് പലരെയും പരിജയപ്പെട്ട കൂട്ടത്തിൽ അയാൾ അവളെയും പരിജയപ്പെട്ടിരുന്നു . പേര് സുമിത്രയാണെന്നും , പഠിക്കുകയാണെന്നും അന്ന് തന്നെ അയാൾ മനസ്സിലാക്കി . പക്ഷെ ,അവളോട്‌ അയാൾക്ക് പ്രണയമൊന്നും തോന്നിയില്ല !..  എങ്കിലും എന്തോ ഒരു പ്രത്യേകത അവൾക്കുള്ളതായി അയാൾക്ക് തോന്നിയിരുന്നു .
           തന്നെക്കാളും ഒരുപാട് പ്രായം കുറവാണ് അവൾക്കെന്ന് അയാൾക്കറിയാമായിരുന്നു . എന്നിട്ടും ! എന്തോ അവളെ കാണുമ്പോൾ അയാളുടെ മനസ്സിൽ പുതുമഴയുടെ നീർകണങ്ങൾ പതിക്കും പോലൊരു കോരിത്തരിപ്പ് അനുഭവപ്പെടുമായിരുന്നു . പലപ്പോഴും പലസ്ഥലത്തും അവളെ കണ്ടുമുട്ടി .പലതും സംസാരിച്ചു . തന്റെ മനസ്സിലെ അനുഭവം മാത്രം പങ്കുവെച്ചില്ല .തന്റെ സംസാരത്തിലും , പെരുമാറ്റത്തിലും അയാൾ താൻ അവളുടെ കാമുകനാണെന്ന് വരുത്താൻ ശ്രമിച്ചു . അവൾക്കത് മനസ്സിലാകഞ്ഞിട്ടാണോ ,അതോ , അയാളുടെ പ്രായം മനസ്സിലാക്കിയിട്ടാണോ ..എന്തോ , അവൾ അയാളോടുള്ള തന്റെ സമീപനം ഒരു കുട്ടിയുടേത് പൊലെ പ്രതിഫലിപ്പിച്ചു .
എന്നാൽ ,അവൾക്ക് തന്നെ ഇഷ്ടമാണെന്ന് തന്നെ അയാൾ വിശ്വസിക്കാൻ ശ്രമിച്ചുതുടങ്ങി .അതോടെ അയാളിൽ ഒരു കാമുകനും ബീരുവും ഒരേ സമയം ജന്മമെടുത്തു .അവളെ കാണാൻ മാത്രം അയാൾ അവൾ പങ്കെടുക്കുന്ന ആഘോഷങ്ങളിലെല്ലാം  മനപ്പൂർവ്വം പങ്കുചേർന്നു .അയാളിൽ ഒരു കാമുകൻ ഉണർന്നപ്പോൾ പിന്നെ അവളെ കാണുന്നതും പെരുമാറുന്നതും സംസാരിക്കുന്നതും എല്ലാം മനസ്സിൽ വിറയൽ അനുഭവപ്പെട്ടുകൊണ്ടായിരുന്നു .
സുമിത്ര അയാളെ വല്ലാതെ മോഹിപ്പിച്ചു . എന്തിന് ! അവിളിത്ര ചെറുപ്രായമായെന്നോർത്ത് അയാൾ സങ്കടപ്പെട്ടു . തനിക്ക് അവളോളം പ്രായമോ ..അവൾക്ക് തന്നോളം പ്രായമോ ..ആയിരുന്നെങ്കിൽ ഒരു പക്ഷെ ! ഈ പ്രണയം പൂവിടുമെന്നെല്ലാം അയാൾ വെറുതെ ഓർത്തു പോയി . ഇതൊന്നും അറിയാതെ സുമിത്ര മറ്റൊരുവന്റെ കാമുകിയാണെങ്കിലോ ..? അയാൾക്കത് ഓർക്കാൻ പോലും വയ്യ !.
ദിവസങ്ങളുടെ രാവുകളും പകലുകളും അയാൾ ചിന്തകളുടെ ആലയിലെ  തീകനലിലിട്ട് പഴുപ്പിച്ചു . അതോടൊപ്പം  തന്റെ പ്രായവും പക്ക്വതയും ഊതിക്കാച്ചിയെടുത്തു .
" സുമിത്ര ചെറിയ കുട്ടിയാണ് .അവളുടെ പകുതിയിലേറെ പ്രായം എനിക്കുണ്ട് ..വേണ്ട ഒന്നും വേണ്ട ..എല്ലാം അവസാനിപ്പിക്കാം "
അയാൾ തന്റെ മനസ്സിനെ പറഞ്ഞു പഠിപ്പിച്ചു . പിന്നീട് കുറച്ചു നാൾ അവളെ കാണാതെ അയാൾ അകന്നു നിന്നു . പക്ഷെ ,വിധി അതിന് അനുവദിച്ചില്ല . പൂരത്തിനിടെ അവളെ വീണ്ടും കാണേണ്ടി വന്നു .
ചുറ്റും നടക്കുന്ന ബഹളങ്ങളെയും , ആൾകൂട്ടത്തെയും അയാൾ ശ്രദ്ധിച്ചില്ല .അയാളുടെ കണ്ണിൽ ആ കൊച്ചു സുന്ദരി മാത്രം ...
 ഭാഗ്യം ! അയാളുടെ സുഹൃത്ത് വീടിന്റെ മുറ്റത്ത് നിൽക്കുന്നത് കണ്ടപ്പോൾ അയാളുടെ ഉള്ളിൽ ഒരു കുളിർ കാറ്റ് വീശി .
മറ്റൊന്നും ചിന്തിക്കാതെ അയാൾ അങ്ങോട്ട്‌ കയറിച്ചെന്നു .സുഹൃത്തിനോട് എന്തെക്കെയോ സംസാരിക്കുന്നുണ്ടെങ്കിലും ,അയാളുടെ നോട്ടം അവളിലായിരുന്നു . നോട്ടത്തിനിടെ അയാളുടെ കണ്ണുകൾ അവളുടെ കണ്ണുകളിൽ ഉടക്കി .അവൾ ചിരിച്ചു .രണ്ടും കൽപ്പിച്ച് അയാൾ അവളുടെ അടുത്തേക്ക് നീങ്ങി .
"നല്ല മേക്കപ്പിലാണല്ലോ .." അവൾ ചിരിച്ചു കൊണ്ട് ചോദിച്ചു .തന്നെ കണ്ടാൽ അവളാദ്യം കുറച്ചു കാലം കാണാതിരുന്നതിനെ പറ്റിയാകും ചോദിക്കുക എന്ന് കരുതിയ അയാൾക്ക് തെറ്റി . "എനിക്കൽപം ഗ്ലാമറുള്ളത് കൊണ്ട് സുമിത്രക്ക് തോന്നുന്നതാ ....സുമിത്രക്ക് സൗന്ദര്യം ഇല്ലാത്തോണ്ടുള്ള അസൂയാവും .." അയാൾ ചിരിച്ചോണ്ടാണ് പറഞ്ഞതെങ്കിലും സുമിത്രക്ക് അതത്ര പിടിച്ചില്ലാന്ന് അയാൾക്ക് മനസ്സിലായി . അന്ന് പിന്നെ പൂര പറമ്പിലും മറ്റും അവൾ അയാളോട് മുഖം കറുപ്പിച്ച് തന്നെ നിന്നു .
അവളുടെ പിണക്കം അയാളെ വിഷമിപ്പിച്ചെങ്കിലും ,ആ പിണക്കത്തിൽ ഒരു പ്രണയം അയാൾ അനുഭവിച്ചു . ദിവസങ്ങളെ ഒരു  പ്രണയ നൗകയാക്കി അയാൾ തുഴഞ്ഞു .
അയാളുടെ സുഹൃത്തിന്റെ മകളുടെ പിറന്നാൾ ദിവസം വീണ്ടും വന്നു.സുമിത്രയെ കണ്ടുമുട്ടിയിട്ട് ഒരു വർഷം തികഞ്ഞെന്നു സാരം . സുമിത്രയോട് അയാൾ സോറി പറഞ്ഞു .നീയൊരു സുന്ദരിക്കോതയാണെന്ന് പറഞ്ഞ്  അയാൾ അവളെ ചിരിപ്പിച്ചു .അവളുടെ പിണക്കം മാറി . പിണക്കം മാറിയ സുമിത്രക്ക് തന്നോട് പ്രണയമുണ്ടെന്ന് മാത്രം അയാളറിഞ്ഞില്ല . എങ്കിലും ഒന്നറിഞ്ഞു . അവൾ അയാളെ ഒരു അങ്കിളായിട്ടാണ് കാണുന്നത് . അവൾ പലർക്കും അയാളെ അങ്ങിനെയാണ് പരിജയപ്പെടുത്തിയത് .
പ്രണയത്തിനിടയിൽ പ്രായം ഒരു പ്രശ്നമല്ലെങ്കിലും , പ്രായങ്ങൾക്കിടയിൽ  പ്രണയം ഒരു പ്രശ്നമാണെന്ന സത്യം ജിവിതത്തിൽ ആദ്യമായി അയാൾ തിരിച്ചറിഞ്ഞു . അന്ന് അയാൾ തന്റെ ഭാര്യയുടെയും കുഞ്ഞിന്റെയുമൊപ്പം സ്നേഹത്തോടെ , സന്തോഷത്തോടെ കിടന്നുറങ്ങി .
അന്ന് രാത്രി അയാൾ  സുമിത്രയെ സ്വപ്നം കണ്ടു!! . ജീവിതത്തിൽ പ്രശ്നങ്ങൾ ഒരു രാത്രികൊണ്ട് അവസാനിക്കില്ലന്ന് ഒരു പക്ഷെ , ഉറക്കമുണരുമ്പോൾ അയാൾ സങ്കടപ്പെട്ടേക്കാം ...!!!!.
                                                   
                                        ***ശുഭം ***
                                                                                   റൗഫ് റഹ്മത്തുള്ള ,